A hoffnungsloser Fall

Schwäbisches Mundart-Gedicht von Gisela Waibel

A hoffnungsloser Fall

I glaub, i be en dr Mauser
ond des scho zwanzg Johr.
Bis heit woiß i noit,
griag i Feadra oder Hoor.

Mei Gsicht wird all länger,
s’braucht emmer meh Platz,
mit dr Zeit roicht’s bis hendre,
noch hoißt ma’s a Glatz.

Was honi alls naufgschmiert,
was hone probiert,
gar nix hot’s gholfa,
i be ganz frustriert.

So, wenn da romlaufscht,
do brauchsch frei scho Muat,
drom kauf i mir demnächst
en schneidiga Huat.

Oder glei a Perücka,
do wäret se luaga,
do gfall i vielleicht noch
sogar jonge Buaba.

Obwohl, - wenn i nochdenk,
muaß des gar it sei,
mir roicht ja zom Luaga
dahoi scho dr Mei!