Wahla

Schwäbisches Mundart-Gedicht von Gisela Waibel

Wahla

Ma sieht, dass wieder Wahla send,
an dr Stroß siehsch blos no Grend.
Lenks ond reachts uf de Plakat,
seachzeh Meter em Quadrat.


Au an de Wänd ond an de Pfoschta,
so a Wahlkampf muaß was koschta.
Ond was se druf oim alls verspreachat,
ond wenn se gwählt send, me vergeasset.


Drnoch will koiner meh was wissa,
dia hond doch all mitnand koi Gwissa.
Ob Schwaze, Rote oder Greene,
Dicke, Dirre, Schiache, Schene.


Ond des boiderloi Geschlechts,
de oine lenks, de andre reachts.
Wo wit etz do dei Kreizle macha,
wär’s it so ernscht, noch dät i lacha.


Apropo Plakat, muaß i no sa:
Stellt sich a braver Handwerksma
a kleis Reklameschild an d’Stroß,
droht glei vo oba ra a Strof.


Dr Grond: S’däb Autofahrer irritiera
ond d’Fahrt kenn en da Graba führa.
Des Gsetz gilt scheinbar nicht für alle,
bsonders nicht in diesem Falle.


Vo dene Grend bischt it blos irritiert,
wenn’s domm hergoht, bischt schockiert.
S’schlemmscht aber ischt dr Dag vor’r Wahl,
do kasch sa, des ischt a Qual.


Schaltsch s’Radio oder s’Fernseah ei,
nix anders kommt wia d’Wählerei.
Hochreachnonga all halb Stond,
langsam wird’s do jedem z’bont.


Ond des zur gleicha Zeit uf alle Sender,
weag dem goht s’Auszehla it geschwender.
Dia sollet wata, bis se’s wisset,
vor se scho ihra Fähnle hisset.


Isch noch alls verbei, goht’s henderher
genauso weiter wia bisher.
De Kleine macht ma schiergar he
ond de Große kriaget emmer meh.


So isch heit übrall uf dr Welt,
s’dreht sich blos om Macht ond Geld.


A Bua hot em Aufsatz über d’Weltgschicht gschrieba,
ond do hot er gwieß it übertrieba:
Lumpen gingen, Lumpen kamen!
Der spricht mir aus der Seele – Amen.