A schlemma Zeit

Schwäbisches Mundart-Gedicht von Gisela Waibel

A schlemma Zeit

A schlemma Zeit isch,
blos Hass ond Streit gibt’s.
Wo naluagesch, Missgunst ond Neid,
für da andra koi Zeit.

Flüchtlingsdrama ond übrall Kriag,
Porno ond Sex, anstatt echta Liab,
Totschlag ond Mord, Verbreacha em Akkord,
Alkohol ond Droga, statt Wohred wird gloga.

Habgier ond s’Geld ond Macht regiert d’Welt.
Große Sprüch vor de Wahla, meh Steira muasch zahla,
de Kleine spirrt ma ei
ond d’Lompa send frei.

Ma schwätzt englisch statt deitsch,
blos no Scheidonga geit’s,
Computer ond Fernseha,
statt Hoimet blos Fernweh.

Koi Arbet für Milljona,
koi Haus zom drenn wohna,
Wohlstand ond Not,
nix isch meh im Lot.

D’Omwelt vergiftet,
dr Reagawald vernichtet,
Kreabs, Aids ond Honger,
s’Ozonloch em Sommer,

Rinderwahnsinn ond Schweinepest,
Glyphosat, des gibt noch no da Rest.

Massatierhaltong ond Monokultur,
Baurasterba en oiner Tour,
Flugzeigabstürz, Naturkatastrofa,
am beschta bleibsch hocka dahoi hendrem Ofa.

Schiffsoglück am laufenda Band,
de andre stecket d’Häuser en Brand,
Banküberfäll ond Geiselnahma,
haufaweis Selbstmord, Familiendrama,
Kindsentführung ond Zugoglück,
de moischte brechet em Auto sich s’Gnick.

Terroraschläg ond Bombadrohung,
Brutalität ond Jugendverrohung.
Em Fernseha blos Krimi,
do wondret’s de it,
dass oi Verbreacha noch am andra gschieht.

Luagesch en Zeitong, stoht nix anders denn,
wenn wird dr Mensch gscheider, i frog mi blos, wenn?

Er will’s it kapiera,
was muaß no bassiera?

Ond dr Mensch soll a Eababild Gottes sei,
drbis isch er so domm, so elend, so klei!
Langsam, do schäm i mi meh ond meh,
dass i a Mensch ond koi Viech it blos be.