Muaß des sei?

Mundart-Gedicht von Gisela Waibel

Muaß des sei?

I ka dia Welt nemme verstau,
wahrscheinlich wird’s no meh so gau.
Schaltsch da Fernseha z’Obed ei,
blos no Krimi, muaß des sei?

Tatort glei uf zwoi, drei Sender
ond des wird frei emmer mender.
Ob Ostra, Pfengsta, ganz egal,
dr Tatort kommt uf jeden Fall.

Jeda Stadt braucht ihren oigna,
s’nemmt überhand, s’isch it zom loigna.
Jeder will da andra übertreaffa,
mit Mord ond Totschlag ond Verbreacha.

Ond noch’ wird om d’Wette gmordet,
d’Leicha verstücklet ond entsorget,
s’Bluat muaß spritza meterweit,
brutal muaß’ sei, des gfallt de Leit.

Ond dr oi ond ander miese Typ
lernt drbei no manchen Trick,
wo vorher fremd no für en war.
Fernseha bildet, isch doch klar!

Sowas gibt’s heit zur Onderhaltong
ond zur Feirobedgestaltong.

Fuchzg Krimi en dr Woch ond meh,
s’wird blos no gmordet, des ischt schö.
Ja, hond mir des noit gnua en echt?
D’Welt isch doch langsam rondom schleacht.

Brauchsch blos en Blick en d’Zeitong werfa,
des koscht oin glei de letschte Nerva.
Schaltsch Nochrichta no ei drzua,
hoscht Verbreacha meh wia gnua.
Terroraschläg mit zig Tote,
des isch tagtäglich heit scho Mode.

Oschuldige wia du ond i,
trifft’s moischtens, ond drom frog i mi:
Muaß ma des no zur Onderhaltong brenga?
D’Leit dätet gscheider mitnand senga
ond des frei noch Lust, ganz ohne Nota,
do gäbs bestemmt drbei koin Dota.

Glei noch dr Tagesschau gond Krimi a,
was Reachts, wenn seha wit, bischt arm dra,
vor zehne brauchsch do it drauf wata,
do kasch ufs Kanapee na flagga.

Vor des, was seha wit, kommt, schlofsch ei,
wenn aufwachsch, ischt scho s’moischt vorbei.
Mit Wuat em Ranza gohsch ens Bett,
de’sch jeden Obed s’gleiche Gfrett.

Do kasch noch’ moischtens nomma schlofa,
doch d’Hauptsach isch, dass eisre Gofa,
noch achte Krimi gugga kennet,
vor se en d’Falla gond ond pennet.

Was mir gern seha wend, frogt koi Sau,
des, was dia wend, des miaß mr hau.
Was dond mir den Sender entressiera,
Hauptsach, mir zahlet brav Gebühra.

Am liabsta gugg i blos no Sport,
obwohl’s do au hoißt „Sport ist Mord“!